Bokhaust i Astrup-bygda

Prinsar, prinsesser og heile det litterære kongeriket har avrunda årtusenets fest på verdas største bokmesse i Frankfurt. Vi tek stafettpinnen med heim til Jølster og ser fram til ein bokhaust som saknar sidestykke i bygda vår!

Vår eigen litterære bokfest startar med ei feiring av salmeskatten. Saxofonist Tore Brunborg kjem til Jølster saman med bassist Mats Eilertsen, Marte Eberson frå Highasakite på tangentar og dottera Siv Øyunn Kjenstad på trommer og vokal. Frank Kjosås kom ikkje i frå innspelinga av ein ny HBO-serie, men betre vikar enn Beate Lech, sist sett i Stjernekamp, kunne vi ikkje drøyme om.

Heddanominert teaterframsyning

Berre ei lita veke seinare inviterer nystarta Jølster litteraturakademi til teaterframsyning på Vassenden skule. «Engelen frå Kobane» var Heddanominert for beste framsyning for ungdom i 2018: Historia om Rehana er ei fiksjonsforteljing, basert på ein myte og ei kurdisk krigsheltinne. Men alt har skjedd – og skjer framleis i verda i dag. Framsyninga vert spelt for elevar i tiande klasse, men er også open for publikum elles.

Med Astrup i grannelaget

I tre år har Jølster bibliotek og Rom for ord samarbeidd om programserien «Litteratur i grendehuset. No er turen komen til Sandalen grendehus. Fredag 8. november inviterer vi til ein festkveld i Astrup-grenda. Vi møter forfattarane Kjersti Mjør og Kjartan Brügger Bjånesøy, som samtalar om korleis ein best kan fortelje om levde liv. Dans og spel, ståmat og rabarbravin står på menyen utover kvelden. Vona er at mange vil ta ordet og fortelje historier som finst på folkemunne, gjerne om grannen i Astruptunet.

 

-Vona er at mange vil ta ordet og fortelje historier som finst på folkemunne, gjerne om grannen i Astruptunet.

Gjestebod på Ålhus

Laurdag 9. november er det tid for gjestebod. Først i Ålhus kyrkje, der Ragnhild Gudbrandsen framfører ein monolog basert på Karen Blixen si vedunderlege novelle; Babettes gjestebod. Deretter i prestegarden, der vi dekkar langbord gjennom dei tre vakre stovene, byr på lokale godsaker og let ordet vere fritt, tonane likeså.

Bokdag og jubileum

Ei ny bokhelg på Ålhus avsluttar den litterære haustfesten på Jølster. Laurdag 23. november er det klart for den årlege bokdagen i regi av Jølster mållag. Jens Kihl og Line Hårklau er gjestene i år. Line Hårklau har etablert seg som ein etterspurt fotograf og frilansjournalist med fjell og friluftsliv som tema. Denne laurdagen held ho kurs for frilans-spirer. Søndag feirer vi Ålhus bokring, landets eldste lesesirkel, med ei feststund i prestegarden. Kjartan Fløgstad, Gabriel Fliflet og Gunnar Yttri står for ord og tonar denne kvelden. For høvet har Silje prest investert i nytt piano i det historiske huset.

Arrangementa vert gjennomførste som samarbeid mellom mange gode krefter i bygda: Jølster mållag, Jølster jazzklubb, Vassenden skule, Sanddal grendelag, Kyrkjene i Jølster og fleire. Vi er ekstra glade for at begge regionteatra våre vitjar Jølster, både Sogn og Fjordane teater og Det Vestnorske Teateret er med på laget.